Rev 18 | MMX | STEP | Melemu at nai aga ven lara laangelo vetpes manga ga si boro vana at laxalibet, mi langsangan lololos teren; la na lavatbung menemen axap ga xasep mi losoosoo ap mo laangelo.

aLur 19:15; 2 Let 28:9; Sam 10:6; Ais 9:14

bJer 51:48

cAis 24:8, 23:8; Jer 7:34, 25:10, 51:49

Revelation of John 18

Moroa Ga Sele Utut Lemenemen Babilon

1 Melemu at nai aga ven lara laangelo vetpes manga ga si boro vana at laxalibet, mi langsangan lololos teren; la na lavatbung menemen axap ga xasep mi losoosoo ap mo laangelo. 2 La ni ga xup lolos keretna,

“Lemenemen silok Babilon ira xapmek pam. La na nga ira lok ngan pam lemenemen aulis ti lubunggas mi laxantoonan kapmek; la lavapixa axap di bilingot la di lok kapmek dik lok teren. 3 La limixin boro at levennep silok axap dira in pam laxandan vaen teren, mo i ru katling loklok ti elongka; la lavaorong silok axap at na lavatbung menemen diga elongka min, la nedi limixin diga sesep mi lempanga atdi digap novos aleng mila mo latkin, lebelen ga ngaongao aleng ti mo lempanga diga sesep min.”
4 La aga ronga laxaka linga vetpes ga si boro vana at laxalibet ga lok,

“Limixin tarak. Mina vas kaxat basinge lemenemen Babilon; lavanga mina sok ka toxot tinimi at laxakapmek at limixin at nom lemenemen; la lavanga minang songot eburu minedi mi mo losongsongot nenia aba raba nedi min. 5 Laxakapmek at nom latkin ira ekovana upana at laxalibet i ngan ta lavatkaana, la ne Moroa ira doma asu vam laxakapmek teren. 6 Mina vorang amlong taba i mi laxapmek ngan neni ga lox i rinimi. La mo laxapmek neni ga lox i rinimi, mina vorang i rin na gepura. La mina raba i mi laxadan vaen no i so bobo aleng ti lara neni ga raba nemi min. 7 Mina raba i mi langsangan losongsongot aleng la lainbulu silok la naba silok kerekngan ni ga lox asilox i mi leemi asu axa min la lapnovos. La keneng at lebelen ni i lox asilox i xeretna, ‘Nenia loorong tixin; nenia kopmen lavatnaa, la nia xopmen noxo lok bukbulu at lorooro axap tarak.’ 8 Kuren la at legesa aleng mene, ne Moroa naba sev i mi tangsangan tosongsongot; lemeremet, la lainbulu silok la langsangan loroxo silok naba vot parav i. La laxao naba rin asonao i mila Leeme Silok ne Moroa i lolos la neni ba ila mumu loklok teren.” ^a

9 La lavaorong silok at na lavatbung menemen, mo digang longka mo latkin la digak lok laxakapmek eburu min, dinabang teng la dina duudu, mo do dina ven lusuxa ap mo laxao na xotos asonao lemenemen Babilon. 10 Diba tu ro vaxalom mi lainmarat mumu mo losongsongot, la diba lok,

“I lok kapmek aleng. Babilon ira xapmek pam. Ni lemenemen silok la i lolos aleng. Ketla at lavanna sangaun minit mene ira lok kapmek pam.”
11 La limixin sesep at na lavatbung menemen dibang teng la diba duudu mumu i, mila kopmen teta noxo un kaka bok ba lempanga atdi. 12 I lok ngan leven gol, levesiliva, levenasen uat gamgames, leven peal, levenasen bantamon avukat, lenbantamon memele, levenasen una avukat, levempanga axap limixin di lox i mi la ivori, levenuna mi luunun silok teren, borons, aen, lemparuat nunuan; 13 la sinomon, spais, levempavaxan so mavak, la laxadan i so mavak, la laxadan vaen, la laxadan monok at la olip, la palava avukat eburu mi levempiao, laxanbulumaxao, la laxasipsip, laxanos, lempatkaris, lavasaxaruki, la i ruturun do diga sesep bok mi limixin. La na lempanga axap no xopmen bok ba teta ba un kaka i. 14 La mo limixin sesep diba lok ti mo lemenemen, “Lempanga nunuan taram uga xovox i, ira sonao vam, la lapnovos taram eburu mi lempanga nunuan taram ira xap pam, la u noxo lok ka amlong bok ba i.”

15 La limixin sesep digap novos aleng ap mo lemenemen, diba tu to vaxalom la diba marat aleng mumu mo losongsongot la dibang teng la dibak saxaanu aleng. 16 La diba lok,

“I lok kapmek aleng. Lemenemen silok Babilon ira xapmek pam. Ni ga umsu mi levesingsigaara ga lok nunuan aleng la ga memele aleng, la ga vonga logol eburu mi levenuat gamgames la leven peal. 17 La keneng mun at lavanna sangaun minit mo lapnovos silok teren ira sonao la ira xap pam.”
La nedi limixin amgomgo at lempattaaxup la nedi di gugu go xeneng, la nedi bok limixin di lok ka luunun at lugugu ro saparap laras, diba tu to vaxalom, 18 la diba ven lusuxa silok ap mo lemenemen, la dibap kup keretna,

“Goxopmen temenemen at na lavatbung menemen kerekngan na lemenemen silok.”
19 La diba revi laxakup to mavana at lempatlak atdi la dibang teng la dibak saxaanu, la dibang teng gagalinga xeretna,

“I lok kapmek aleng. Lemenemen silok Babilon ira xapmek pam. Laxantaaxup ga oso go kusu na lox asu lapnovos silok ti limixin ap mo lemenemen silok. La keneng mun at lavanna sangaun minit la lempanga axap teren ira seeve vam.”
20 La lara laxaka linga ga lok bok,

“Nemi axap mik lok to vana at laxalibet, mina momo. Nemi limixin at ne Moroa, la luvuttadi vavang la lavaeme vapaase alii, mina sosoro aleng, mila ne Moroa ira vorang taba vam i mi langsangan losongsongot mumu lempanga xapmek neni ga lox i rinimi.” ^b

21 La lara laangelo lolos ga ranga ka lara langsangan lavaruat la ga lu arup min to at laras la ga lok keretna,

“Lemenemen silok Babilon; at na mun langas lara ba lu asi mi na lemenemen kerekngan na lavaruat, la kopmen tara noxo vuse ka bok ba i. 22 La teta noxo ronga ka bok ba lerengteng at levengkontaaleng, lerengteng kaka tadi, lerengteng kaatu eburu mi lerengteng at luru keneng teren. La taradi gugu noxo lok bok ba lugugu ren go, la kopmen bok ba tavaruat noxo sax amumus levempiao. 23 Di noxo ven kaka bok ba losoosoo at lababao do xeneng at nom lemenemen, la di noxo ronga bok ba teepang amomo at teloklox epot maxat. La luvuttadi apnovos me go nedi diga lolos aleng keneng at lavatbung menemen axap, la diga sak tup mi lara nep silok axap mumu mun lengkot at lemenemen digak lox i. 24 La na lemenemen Babilon i ruuna ka losongsongot mila diga vuse ka laxanda at lavaeme vapaase alii eburu mi limixin at ne Moroa ro xeneng ap mo lemenemen silok; laaba, lada atnedi axap no limixin diga sep nedi at na lavatbung menemen.” ^c